Illas Canarias, Tenerife: Parque Rural de Anaga. Ruteiro circular de Las Carboneras - Chinamada

Sendeirismo polo Parque Rural de Anaga: Sendeiro dos sentidos. Ruteiro circular de Las Carboneras - Chinamada

Febreiro 2020

O Parque Rural de Anaga atópase no extremo nordeste da illa de Tenerife, está declarado Reserva da Biosfera pola súa fauna e a súa flora pero especialmente polos seus bosques de laurisilva, tamén chamados monteverde.

Atopámonos cunha paisaxe de abruptas cordilleiras de cumes recortados con profundos vales e barrancos que descenden ata o océano. É a parte máis verde da illa, aínda que o que máis nos chamou a atención da súa vexetación é a ausencia de silvas, toxos ou arbustos espiñentos en xeral, poderíase dicir que é un monte “amable” que permite ser atravesado sen a necesidade de camiños, algo moi diferente ao que estamos afeitos no norte da península Ibérica.

Espertamos cun día asollado pero fresco á primeira hora, chegamos a Cruz del Carmen sobre as 9 a.m., hai un pequeno aparcamento onde aparcamos sen problema pero que unha hora despois xa estaba repleto a pesar de ser o mes de febreiro. Como o Centro de Visitantes non estaba aberto, decidimos facer o Sendeiro dos Sentidos, claramente sinalizado, mentres faciamos tempo.

Sendeiro dos Sentidos

O Sendeiro dos Sentidos ten 3 alternativas segundo a súa dificultade, todas elas aptas para o público en xeral, nós fixemos a máis longa e apenas percorremos 1,5km con 90m de desnivel positivo. Realmente é un paseo para realizar sen présas, para o goce da vista, o oído, o olfacto e o tacto… o do gusto queda reservado á escrupulosidade de cada un. Segundo avanzamos polo sendeiro atoparemos sinalización indicando que tipo de sentido debemos agudizar en cada zona.

Nós gozamos dun día moi agradable, non había humidade polo que o camiño de terra estaba seco e tampouco tivemos néboa o que nos permitiu gozar das vistas dende o Miradoiro do Llano de los Loros cara ao Encoro de Tahodio con Santa Cruz ao fondo, merece a pena pararse un momento e contemplar cada detalle.

Sen dúbida foi un roteiro relaxado, que propón pausas para que tanto maiores como os máis pequenos dediquen un instante á percepción da contorna que os rodea.

Unha vez de volta ao aparcamento dirixímonos ao Centro de Visitantes Cruz del Carmen, alí déronnos moitísima información tanto de roteiros en Anaga como de actividades en practicamente toda a illa.

Alén da estrada xeral, hai un edificio que ten unhas escaleiras para acceder a un miradoiro no seu tellado dende onde se pode ver o noso próximo destino, Las Carboneras e Chinamada.

Roteiro circular de Las Carboneras - Chinamada

Dirixímonos por estrada cara ao norte, ata o pobo de Las Carboneras e aparcamos ao principio do pobo, en fronte dun restaurante. Retrocedemos andando uns metros ata unhas escaleiras que sinalizan cara a “Cruz del Carmen” pero ese non será o noso destino, máis adiante nun cruzamento poderemos ir cara a Chinamada. Comeza aquí un roteiro circular que non chega ao 8km con apenas 360m de desnivel positivo aínda que ao final teñas a sensación de que tivo que ser máis.

Un roteiro de sendeirismo cómoda con abundante e frondosa vexetación na que ao principio fomos gañando altitude para dar paso ás vistas de marcados e profundos barrancos, salpicados con afastadas construcións que resaltan a magnitude da contorna. O día foi despexando, a presenza do sol aumentaba a temperatura e a posibilidade de atoparte con lagartos e lagartas que fuxían da nosa presenza, máis fácil de fotografar foron as cabras que nos miraban curiosas dende os cercados que delimitan co sendeiro.

En 3,5km chegamos a Chinamada. O máis curioso deste lugar son as casas cova, escavadas na roca que nalgúns casos seguen servindo como vivenda para os aldeáns, ademais tamén atoparemos unha pequena ermida e un restaurante con terraza. O roteiro continua ata chegar ao Miradoiro de Aguaide, un balcón ao bordo dun espectacular cantil dende onde se pode contemplar unhas magníficas vistas de La Punta del Hidalgo e a inmensidade do Océano Atlántico.

A volta cara a Las Carboneras realizámola inicialmente por estrada, ascendemos ata que se volve a ver o Roque de Taborno de lonxe e a estrada comeza o seu descenso, a man dereita atopamos unhas escaleiras de pedra que permiten abandonar a estrada e seguir o noso roteiro por un sendeiro no que gañamos altitude para finalmente descender ata o noso destino.